Novo denique perniciosoque exemplo idem Gallus ausus est inire flagitium
grave, quod Romae cum ultimo dedecore temptasse aliquando dicitur Gallienus,
et adhibitis paucis clam ferro succinctis vesperi per tabernas palabatur et
conpita quaeritando Graeco sermone, cuius erat inpendio gnarus, quid de
Caesare quisque sentiret. et haec confidenter agebat in urbe ubi
pernoctantium luminum claritudo dierum solet imitari fulgorem. postremo
agnitus saepe iamque, si prodisset, conspicuum se fore contemplans, non nisi
luce palam egrediens ad agenda quae putabat seria cernebatur. et haec quidem
medullitus multis gementibus agebantur.
Ardeo, mihi credite, Patres conscripti (id quod vosmet de me existimatis et
facitis ipsi) incredibili quodam amore patriae, qui me amor et subvenire olim
impendentibus periculis maximis cum dimicatione capitis, et rursum, cum omnia
tela undique esse intenta in patriam viderem, subire coegit atque excipere
unum pro universis. Hic me meus in rem publicam animus pristinus ac perennis
cum C. Caesare reducit, reconciliat, restituit in gratiam.
Et quia Montius inter dilancinantium manus spiritum efflaturus Epigonum et
Eusebium nec professionem nec dignitatem ostendens aliquotiens increpabat,
qui sint hi magna quaerebatur industria, et nequid intepesceret, Epigonus e
Lycia philosophus ducitur et Eusebius ab Emissa Pittacas cognomento,
concitatus orator, cum quaestor non hos sed tribunos fabricarum insimulasset
promittentes armorum si novas res agitari conperissent.
